|
Ho catà en par de sgalmaréte tachè ìa sul granàr.
Iera de me bupà quando l’era buteléto.
A ci no sà sa, i è le sgalmare, ghe spiegarò de meio.
Prima de tuto ghì da saèr che i è na specie de scarpe.
Al posto dela sola gh’è legno rinforsà nele ponte e nei tachi da laminéte de fèro.
El de sora l’è de pèl come na scarpa vera.
Donca disea de ste sgalmaréte: la pèl ormai l’è dentà dura e ’nrisolà,
sul legno ghè i segni de acqua empionbegà.
Ma a tegnarle 'n man, me par de sentir ancora el calor dei piedini del quel discoléto che cori ciocando sule strade sensa sfalto, o che tribula sbrissiando sula neve nando a scola.
De sgalmare el gh’ea solo quele lì e bisognaa tegnarle da conto sennò el nasea ia descalso fin a st’an che ven.
No è mia pasà dei secoli, più o meno sesant’ani.
Adeso tuti i ga scarpe a ùfete e de sgalmare i conossi solo
l’associazione marciatori de Colà.
Gianna Caldana Brusco |
Notizie
